Paroles
Mwin la met le temps
Ma met l’amour dedans
M’a dû rode les mots
M’a fait travay coco
Mwin la travay dur
Pou k’le projet y devient mur
Enfin li sorte zordi
Mon rêve y réalise
Même si le temps y paré a ou long
Largue pas le bout tien a li bon
Met si papier ton bon’ idées
Un autre soley twé va guinlle réaliser
Y fo l’arzen, y fo le temps
Met tout out force dans out projet
Ti pas ti pas out rêve va ni réalité
La prend a mwin 10 ans
M’a guinlle marmaille entre temps
C’est jamais l’bon moment
Pou fé l’enregistrement
Mais quand ou vé vraiment
Ou largue pas volant
Ou pense à li souvent
Et un zour ou bek devant
Ou travay pas mais où profite
Ti coz un tas et ti profite
Ti vé voyaze et ti profite
Ou vé gran caze et où profite
Ou fé pas ménaze et où profite
T’a poin l’euro et ti profite
Ti sa resto et ti profite
Tu vé loto et ti profite
Où fé le fier devant out dalon
Ou lèv touzour out ver pou un oui pou un non
Pou fé vwar ou lé la pou fé vwar ou lé bon
Mé quand fo paye un zafair là où n’a pi un rond
Ou vé manz restaurant manz la caze lé pas bon
Y fo rode le plus grand t’ar besoin fé la pionte
La ti commande caviar pou manz ek ton champagne
Et quand y arrive la note la y fo k’nou partaz
Ou lé un profiteur
Out larzen lé qu’un leurre
Ou compte touzour su les autres
Mé nous lé pas out zapotres
Ou coze plus fort et y fo écoute à ou
Out zistoir lé en or y doit impressionne à nous
Ou la fé tout dans out vie ou la voyaze partout
Mais à chaque foi ou sorte la ou na point un sous
Ton dalon n’a l’arzan donc c’est li k’doi payer
Son loto lé plus gran cé cet y prend pou alé
Ton dalon n’a piscine donc c’est chez li k’fo fêter
Mé ou arrive les mains vide ou lé touzour invité
Ti pass le bac
Et y fo fé zétude
Ou na rien dans out sac
Alé en France ça lé rude
Y fo ou sa va
Pou apprendre un travail
L’école laba néna
Ou restra pas su la paille
Mé quand nou arvien?
Quand ou fé revenir a nou?
Travay ici nou na point
Et nou doit rest loin de ou
Envoy marmay l’autre côté la mer
Loin d’son famille loin d’son repère
Apprend l’école vni ingénier
Pas pou ici mais pou ailleurs
Ti viv dans la fré
Tou sèl dans 15 mètre carré
Foto la Réunion si lo mur
Ou tien bon mêm si lé dur
Papa momon la payé
Aster ou doit assurer
Quand zétude sra terminé
Ou coné travail ou sa gagné
5 ans apré ou arvient
Out zoli cv dans la main
Tous les zours ou rod un travail
Tous les zours un autre bataille
Ou lé ingénier
Mais pou ingénier lé pas l’heure
Si ou néna lo ker
Ou pé être webmaster
Ti dit a li oui
Ti dit a li non
Finalement c’est oui
Cet la pou la vie
Mariaze, voyaze
Ou lé su un nuaze
Et un jour viraze
Et ou tourne la paze
Et ou tape a li
Comme out l’énemi
Na pu l’amour dans out zié
Rienk la colèr entre zot dé
Na pu nuaze n’a rienk la rage
Na rienk violence conjugale
Ar pense le jour twé la dis oui
Tape pas mé laisse a li partir!
Li nerv a ou
Et ti comprend pi
Ti rentr et toué lé sou
Mé sar pas son fote a li
Ou tien mêm pas de bout
Mé ou trouve encore la force
Pou alé rode le bout
Ou devient plus féroce
Quand li lé a terre et kli guinlle pi bouger
Cossa y pass par out tete pou cou guinlle continuer?
A coz ti lève la main si un fem sans défense?
Allé mont si un ring na war koué ti pense
Combien d’fois twé la cachette?
la têt baissé la main su la têt.
Arrêt respiré pou espéré
ke lo vié y pass vite sans voir a twé?
Et combien d’fois ton kèr y arret?
Ou dmand a twoué si ou té préfer pas naître?
Toussa kestion y pass par out tête
Rienk quand ou pense la douleur lo fouette!
Tap pas mwin papa
Ca pas l’éducation ça y march pas
Su le moment ou néna la paix
Mé dans 10 ans sra un rescapé!
Ou lé pas bien su le moment
Pas la peine tire out rage su out zenfant
Ou va casse a li, li va éloigne de ou
Sat ou guinlle zordi demain va ni flou!
Zordi marmaille y doit pas cozé
Quand gramoune y coze fo rest su côté
Si ou néna le malèr pas écouté
Ou coné baizement y sa arrivé
L’éducation ou sa donne a li
Y ca coute a li des années de psy
Pou découvre a li pou guinlle confiance
Pou fé croire a li li navé un l’enfance
Vive dans la peur c’est un l’horreur
Fé croire zinvité ou naz dan’ bonheur
Fo guinlle bonne note pou pas fé honte le vié
Ca y montre son léducation l’été sérié
Pli tard li nora un trouble de l’attachement
Li va met aussi la fote su son momon
EMDR, ICV et mêm l’hypnose
Li va essay tout pou kson coeur y recoz
Mwin la ariv dans out vie
Ou partage a mwin la vot
Ti regard a mwin ton yeux y brille
Mwin lé le plu bo parmi lé autres
Ou la fé grandi a mwin
Oula touzour donne a mwin la main
Mêm quand mi tombe ou prend la relève
L’amour lé tatoué su out lèvres
Ou lé tout pou mwin
Ou lé tout cet mwin la besoin
Quand mi rire ou lé la
Quand mi plèr y dure pas
Avec ou
Et quand mwin lé blessé
Mwin lé réconforté
Grâce à ou
Parfoi ou sacrifie a ou
Pou ke mi mank jamais de rien
Mêm quand ou na point un sous
Ou trouv le moyen fé plaisir a mwin
Et même quand ça navé point
Out bras té fé a mwin calin
Et quand mwin lé en souffrance
Ou lé la première a ki mi pense
Quand li lé ptit li lé zoli
Out ker y bat ou adopt a li
Ou achet son panié ek son crokette
Ou joué ek li tous les jours c’est la fête
Ti caline a li ti donne a li l’amour
Ou dit a li que va dur pou touzour
En plus ek ça ou fé plaisir marmaille
Grace a ou néna bohnér dans la caze
Mé abandonne pas li
Ca out choix li li la pas choisit
Abandonne pas li
Rienk parcke li la grandit
Abandonne pas li
Rappel a ou quand li l’été petit
Abandonne pas li
Ou lavé promis
Combien lo chien mi croize su la route?
Lé maigr ek rien le zo sous la croûte
Manzé, lo joué, la caze li na point
Un ti caresse et l’amour encore moins
Poukoué ti attach a li a un bout bois?
Ti condamne a li et ti rgarde même pas
Ar pense le zour twé la adopt a li
Té vo la peine pou laisse a li zordi?
Ou n’a l’ambition
Un gros travail un gros maison
Ou vé loto ou vé l’arzen
Maison connectée dan l’air du temps
Vacance y doit être le plus loin
Voyage en 1ère champagne à la main
Out linze y doit touzours être marqué
Y fo k’demoune y remark a twé
Mé lève ton tête un l’instant
Garde le monde sous out pied
N’a point la place pou out zenfant
Out l’arzen lé rienk pou twé
Ti cours derrière le matériel
Mé ton kèr lé vide toute lé semaines
Ti achète tout mais dans les faits
L’arzen y cache ton vérité
Ou n’a tout mé y suffit pas
Tout pou ou c’est un grand débat
Y fo un caze encore plis grand
Avec piscine ek cheminée dedans
Ti achète touzours le plus cher
Montre les autres k’cest ou le meyer
Mais dans ton caze ou lé souvent tout sèl
Ton larmes y vient remplir ton recueil
Allé l’école
Avec la boule au ventre
Allé l’école ça lé mol
Ou demand quan ca ou rentre
Quand la cloche y sonne
Marmailles y attend a ou
Dans ton tete y résonne
Ou conné ou ca guinlle le coup
Et commen nou fé
Comment nou conné
Quand un marmaille lé harcelé?
Li rentre la caze
Son tete lé en pagaille
Li passe à coté
Mais sans jamais cozé
Cossa y spass l’école
Pou rendr a li comma?
Ek ki fo mi coze
Pouk la violence y arrete la
Bon marmaille la peur
Et y vé pi aller
Et mem lo directeur
I conné pas koua fé
La récréation
Y tourne en baston
Ou lé noir ou lé gros
Ou lé maigre ou lé pas beau
Toussa d’mot y blesse
Juste un mot y rabaisse
Et nou voit pas rien
Nou lé si pré mais si loin
Ravine à malheur
Li porte bien son nom
D’habitude moto c’est lo bonhèr
Mé zordi la été plus que la passion
Comme d’habitude un l’entraînement
Où prépare à où mentalement
Ti roule fort ek ton dalon
Néna la course y fo être champion
Nena demoune derrière toué
Nena l’espoir dans nout yé
Quand néna un l’ange y appel à toué
Ou largue guidon et où fini par tomber
Quentin cousin té ton dernier saut
Té pas le plus beau
Mé mwin n’a point les mots
L’hélicoptère y vient rôdé à toué
Mon ker y serre et mwin la po pleuré
Papa à côté la po esperé
Que passion la zordi y sava pas tuer
Mwin lé a coté mais mwin lé si loin
Mwin lé impuissant mi guinlle pas fé rien
Mi guinlle la nouvelle et mwin lé choqué
Alors mi prie pou voir à twé lever
Deux trois jour après mi guinlle la nouvelle
Doctèr y dit ou té fin’ prend out zailes
Ton yé y ferme ton ker y arrêt
Ou peu être sur que lat not la arrêt avec
Quentin cousin ou mank à mwin
Ça lé pas ziste l’été pas out l’ér lé certain
Un dernier mot pou dit à twé à Dié
Mi esper kla haut mon mot va arriver
magnus es tu Deus (Dié lé grand)
Où sar pas la messe
Ou sar pas prier
Ou cava just la kermesse
Quand n’a un zafair pou gagner
Ou crois pas en Dié
D’ailleurs où crois pas en rien
Mais quand néna un l’enzé
La où connaît a li bien
Quand y arrange a ou
La dieu lé partout
Ou cava l’église
Ou prie même su genoux
Ou dit ou néna la foi
Ou n’a plutôt que parfois
Quand ou la besoin un zafair
La y serv la prière
Pou pass un l’examen
La ti sert ton deux main
Ti allume un bougie
Ti prie la vierge Marie
Et quand tout lé fini
Ou fin oubli à li
Ou eteind la bougie
Y fo pas ou gaspille
Ti lève tous les matins
Ti sa travail pou presk rien
Ti prend lo bus ti pren le train
Travail lé en ville mé ton caze lé loin
Ti arrive en retard
Patron y met a twé un pétar
Ou doit travail un pé plus tard
Ou koné ou sa rentr dans fé noir
Alors c’est ca la vie?
Lev grand matin
Fé un travail ta pas envi
Supporte un patron
Et guinlle pas un rond
C’est ça la vie nous la choisi?
Eske nou na le choix
D’choisi la vie la
Dis a mwin sérié mé mi crois pas
Cossa nou fé la?
Poukoué nous fait ça?
C’est pas ça la vie ke mwin té voua
Ti doi élève ton marmaille
Alors qu twé mem lé rabaissé
Montr à zot la valeur un travail
Met un peu l’arzen si coté
Si ou vé pas galère comme papa
L’école fo ou rest concentré
Guinlle un travail y fatigue pas
Plus tard ou va guinlle voyagé
Ti commence bas
Et ti vise tellement haut
L’arzen ou voit deza
En costume cravate ou lé bo
Et ou réussi
Larzen lé déjà dan out main
Ou oubli d’où ça ou vient
L’arzen la lé zoli
Et y fo montre à li, plis ti monte
Plis ou montre où la réussi
Plis ou grandit Plis ton salaire y monte
Plis ou achète zoli montre
Ou travay dan’ grand tour Ou oubli oussa ou sorte
Derrière ou la fin’ ferme la porte
Out loto lé bandé, larzen y change à twé
Mé oubli pas kissa ou lé
Devant tableau blanc ou lé fier
Ou présente out travay
Ou la ni ingénier
Larzen y tombe sans bataille
Et y fo montre a li
Fé la pionte devant out dalon
Ti manz pate mé pi do riz
La out sorte pi la réunion ?